កំពង់ឆ្នាំង៖ មន្ទីរព័តមានខេត្តកំពង់ឆ្នាំង នាព្រឹកថ្ងៃទី៣ ខែមិនា ឆ្នាំ២០២០នេះ បានរៀបចំប្រារព្វខួបអនុស្សាវរីយលើកទី១០៩ ទិវានារីអន្តរជាតិ ៨មិនា ក្រោមប្រធានបទ «មានសន្តិភាព មានការលើកកម្ពស់យេនឌ័រ » ក្រោមអធិបតីភាព ឯកឧត្តមម៉ម ឈឿម ទីប្រឹក្សាក្រសួងព័ត៌មាននិងជាប្រធានមន្ទីរព័ត៌មានខេត្តកំពង់ឆ្នាំង ។
លោកស្រី កែវ សេងសុចិន្តា អនុប្រធានការិយាល័យវិទ្យុ តំណាងអោយនារីនៃមន្ទីរព័ត៌មានខេត្ត បានអោយដឹងថា មន្ទីរព័តមានខេត្តកំពង់ឆ្នាំង ស្រ្តីដែលបានបម្រើការងារលើវិស័យព័តមាន មានចំនួន១៧រូប ក្រៅពីនោះក៏មានស្រ្តីដែលបម្រើការអោយវិស័យព័ត៌មានឯកជនផងដែរ ។ នៅលើវិស័យព័ត៌មានដូចជា ពិធីការនី អ្នកបច្ចេកទេស អ្នកយកព័តមាន អ្នកតែងនិពន្ធអត្ថបទព័តមាន និង បញ្ចូលសម្លេង ដែលធ្វើការផ្សព្វផ្សាយតាមប្រព័ន្ធផ្សព្វផ្សាយរបស់រដ្ឋមានវិទ្យុជាតិរបស់ខេត្ត និង ទូរទស្សន៍របស់ខេត្តផងដែរ ។
លោកស្រីបន្តថា តាមរយៈនៃសកម្មភាពទាំងនេះបានធ្វើការផ្សព្វផ្សាយដល់សាធារណៈជន បានយល់ដឹងអំពីតម្លៃរបស់ស្រ្តី តាមរយះនាទីអប់រំ វប្បធម៌ និង ព័តមានផងដែរ ។
ឯកឧត្តម ម៉ម ឈឿម ប្រធានមន្ទីរព័តមាន និង ជាទីប្រឹក្សានៃក្រសួងព័ត៌មាន បានមានប្រសាសន៍ដោយលើកឡើងថា ស្រ្តីនៅក្នុងវិស័យព័ត៌មានគឺពិតជាមានសារៈសំខាន់ មិនអាចខ្វះបាន ដែលជាដៃគូ ដ៏ប៉ិនប្រសព្វ ក្នុងការជម្រុញអភិវឌ្ឍន៍អោយវិស័យព័ត៌មានបានកាន់តែប្រសិទ្ធភាពទ្វេរឡើងផងដែរ ។ ហើយចំពោះប្រធានបទនាឆ្នាំនេះ « មានសន្តិភាព មានការលើកកម្ពស់យេនឌ័រ » ក្នុងគោលបំណងបន្តរំលេចពីតម្លៃនៃសន្តិភាព និង អរគុណសន្តិភាព ដែលបានប្រែក្លាយប្រទេសកម្ពុជាពីគំនរផេះផង់ បែកបាក់ជាតិ និងបែងចែកទឹកដី ទៅជាទឹកដីប្រកបដោយសន្តិភាព ស្ថិរភាព សេរីភាព ប្រជាធិបតេយ្យ នីតិរដ្ឋ និងកំពុងអភិវឌ្ឍន៍លើគ្រប់វិស័យ ព្រមទាំងមានការចូលរួមដោយស្មើភាព និង ស្មើសិទ្ធិជាមួយបណ្តាប្រទេសនានា ទាំងក្នុងតំបន់ និងសកលលោក។
ឯកឧត្តមប្រធានមន្ទីរ បានបញ្ជាក់ថា ការលើកកម្ពស់សមភាពយេនឌ័រ ជាពិសេស វប្បធម៌អហិង្សាដែលរាជរដ្ឋាភិបាល បាននឹងកំពុងគាំទ្រជំរុញ ឱ្យមានការចូលរួមពីគ្រប់ស្ថាប័ន រួមទំាងបុរសទាំងស្រ្តី ដើម្បីវឌ្ឍនភាពសង្គមឆ្ពោះទៅលើកកម្ពស់សិទ្ធិ ស្ថានភាព ជីវភាព ឋានៈ តួនាទីរបស់ស្ត្រី ក៏ដូចជាសុខុមាលភាពសង្គម ដោយធ្វើការទប់ស្កាត់ និងកាត់បន្ថយអំពើហិង្សា ព្រមទាំងដោះស្រាយជម្លោះនានាដោយសន្តិវិធី។
ឯកឧត្តម ម៉ម ឈឿម បានណែនាំដល់ស្រ្តីដែលបម្រើការងារ លើវិស័យព័ត៌មាន ត្រូវពង្រឹងសមត្ថភាពរបស់ខ្លួនបន្ថែមទៀត ក្នុងការចូលរួមកិច្ចការងារ សង្គមជាតិ និងធ្វើយ៉ាងណាឱ្យក្លាយខ្លួនជាអ្នកផ្តល់ព័ត៌មានពិតប្រាកដ ដល់សាធារណជន អោយបានយល់ដឹងកាន់តែច្បាស់ រាល់បញ្ហាវិជ្ជមាន និង អវិជ្ជមាន នៅក្នុងសង្គមពិសេសគឺលុបបំបាត់ទាំងស្រុងរាល់ព័ត៌មានក្លែងក្លាយ ៕
