កំពង់ឆ្នាំង ៖កាលពីថ្ងៃទី២៤ ខែតុលា ឆ្នាំ២០២៦ ឯកឧត្តម ឆាយ ឫទ្ធិសែន សមាជិកគណៈកម្មាធិការកណ្ដាលគណបក្សប្រជាជនកម្ពុជា អនុប្រធានទី១ ក្រុមការងារគណបក្សចុះមូលដ្ឋានខេត្តកំពង់ឆ្នាំង និងជាប្រធានក្រុមការងារគណបក្សចុះមូលដ្ឋានស្រុកសាមគ្គីមានជ័យ និងស្រុកទឹកផុស រួមជាមួយឯកឧត្តមក្រុមការងារគណបក្សចុះមូលដ្ឋានស្រុកទឹកផុស បានអញ្ជើញពិនិត្យវឌ្ឍនភាពសាងសង់អគារសាលប្រជុំថ្មី នៅក្នុងបរិវេណស្នាក់ការគណបក្សប្រជាជនកម្ពុជាស្រុកទឹកផុស ខេត្តកំពង់ឆ្នាំង ដែលជាអំណោយដ៏ថ្លៃថ្លារបស់សម្តេចតេជោ ហ៊ុនសែន ប្រធានគណបក្ស និងសម្តចធិបតី អនុប្រធានគណបក្សប្រជាជនកម្ពុជា។
អគារសាលប្រជុំថ្មីនេះ មានទំហំប្រមាណ ៨៣០ម៉ែត្រក្រឡា កម្ពស់ ១ជាន់ អាចផ្ទុកមនុស្សបានចំនួន ១០០០នាក់ ។អគារសាលប្រជុំថ្មី ដែលមានរយៈពេលសាងសង់ចំនួន ៨ខែ គិតមកដល់បច្ចុប្បន្ន ការងារសាងសង់សម្រេចវឌ្ឍនភាពបានប្រមាណ ៦០% ហើយគ្រោងនឹងបញ្ចប់នៅចុងឆ្នាំ២០២៦ នេះ។
ក្នុងឱកាសពិនិត្យនោះ ឯកឧត្តមប្រធាន បានណែនាំដល់អ្នកទទួលការសាងសង់ត្រូវយកចិត្តទុកដាក់អនុវត្តឱ្យបានត្រឹមត្រូវតាមគំនូសប្លង់ ដើម្បីឱ្យសំណង់មានគុណភាពល្អ និងត្រូវពន្លឿនការសាងសង់ឱ្យបានលឿនស្របតាមកិច្ចសន្យា ៕
