កំពង់ឆ្នាំង : គណៈកម្មការសុវត្ថិភាពចរាចរណ៍ផ្លូវគោកខេត្តកំពង់ឆ្នាំង កាលពីថ្ងៃទី២៨ ខែកក្កដា ឆ្នាំ២០២០ បានបើកកិច្ចប្រជុំបូកសរុបការងារសុវត្ថិភាពចរាចរណ៍ផ្លូវគោកប្រចាំឆមាសទី១ និងលើកទិសដៅការអនុវត្តក្នុងឆមាសទី២ ក្រោមអធិបតីភាព ឯកឧត្តម ឈួរ ច័ន្ទឌឿន អភិបាលខេត្តកំពង់ឆ្នាំង និង លោក លោកស្រី ជាថ្នាក់ដឹកនាំមន្ទីរអង្គភាពជុំវិញខេត្ត។
លោក ឆាយ លាភា ប្រធានមន្ទីរសាធារណការ និងដឹកជញ្ជូនខេត្ត បានអោយដឹងថា នៅក្នុងឆមាសទី១ កន្លងមកនេះមន្ត្រីជំនាញបានធ្វើការចុះបញ្ជីយានយន្ត ផ្តល់បណ្ណបើកបរ ត្រួតពិនិត្យលក្ខណបច្ចេកទេសយាន្តយន្ត ការចុះត្រួតពិនិត្យ និងផ្សព្វផ្សាយអំពីច្បាប់ចរាចរណ៍ផ្លូវគោក ដល់គ្រប់មូលដ្ឋាននានានៅក្នុងខេត្តកំពង់ឆ្នាំង ។ ហើយនៅក្នុងឆមាសទី១ ឆ្នាំ២០២០នេះ បានកើតឡើងចំនួន២១លើក មានការថយចុះ៣១បើប្រៀបធៀបនិងរយៈពេលដូចគ្នាឆ្នាំ២០១៩ ។
ជាមួយគ្នា ឯកឧត្តម ឈួរ ច័ន្ទឌឿន អភិបាលខេត្តកំពង់ឆ្នាំង បានបង្ហាញការ កោតសរសើរដល់មន្ត្រីជំនាញទាំងអស់ដែលខិតខំប្រឹងប្រែងក្នុងការចូលរួមធ្វើការផ្សព្វផ្សាយ និង អនុវត្តនូវវិធានការការរឹតបន្តច្បាប់ចរាចរណ៍ផ្លូវគោកមានប្រសិទ្ធិភាពខ្ពស់ និងដាក់ចេញវិធានការបន្ថែមក្នុងការរឹតបន្តឹងទៅលើប្រើប្រាស់រថយន្តកែច្នៃ ទោចក្រយាន្តយន្តច្នៃសណ្តោងរឺម៉ក និងគោយន្តចេញចូលក្រុង ដើម្បីបញ្ជៀសអោយបាននូវគ្រោះថ្នាក់ជាយថាហេតុ ។
ឯកឧត្តម អភិបាលខេត្ត បន្តទៀតថា កន្លងមកករណីគ្រោះថ្នាក់ចរាចរណ៍ភាគច្រើន បានបណ្តាលមកពី រថយន្តកែថ្នៃ គោយន្តកន្រ្តៃ បើកបរលើសល្បឿនកំណត់ និងមិនមានប្រព័ន្ធសុវត្ថិភាពគ្រប់គ្រាន់ ។
ឯកឧត្តម ឈួរ ច័ន្ទឌឿន ក៏បានសំណូមពរដល់អនុគណៈកម្មការសុវត្ថិភាពចរាចរណ៍ផ្លូវគោកខេត្ត ត្រូវចូលរួមសហការបន្តជាមួយ ការិយាល័យសាធារណការ អធិការដ្ឋាននគរបាល និងបញ្ជាការដ្ឋានកងរាជអាវុធហត្ថគ្រប់ក្រុងស្រុកទាំង៨ ត្រូវចុះផ្សព្វផ្សាយច្បាប់ចរាចរណ៍ផ្លូវគោក ចុះចងបដាអប់រំស្តីពីច្បាប់ចរាចរណ៍ និង ការរឹតបន្តឹងច្បាប់ចរាចរណ៍គ្រប់គោលដៅដែលបានកំណត់ និងបង្កើនការផ្សព្វផ្សាយអំពីវិធានការ បង្ការ ទប់ស្កាត់ នៃការរីករាលដាលជំងឺកូវីត១៩ ផងដែរ៕
