កូនដំរីញី ដែលប្រទះឃើញនៅដែនជម្រកសត្វព្រៃភ្នំព្រេច បានស្លាប់ហើយនៅថ្ងៃទី២០ មករានេះ

myfm radio — Mon, 20 Jan 2020 06:53:47 +0000

កូនសត្វដំរីព្រៃញីមួយក្បាលដែលមានអាយុប្រហែល១សប្ដាហ៍ មានអាការៈស្គមស្គាំងដែលប្រទះឃើញដេកដួលនៅចំណុចព្រៃសាក្រឹត ខេត្តមណ្ឌលគិរី បានស្លាប់ហើយនៅវេលាម៉ោង៣ទៀបភ្លឺ ថ្ងៃទី២០ ខែមករានេះ ដោយសារតែស្ថានភាពធ្ងន់ធ្ងរមិនអាចសង្គ្រោះបាន។ នេះបើតាមសេចក្ដីប្រកាសព័ត៌មានរបស់មន្ទីរបរិស្ថានខេត្តមណ្ឌលគិរី នៅថ្ងៃទី២០ ខែមករា ឆ្នាំ២០២០នេះ។

មន្ទីរបរិស្ថានខេត្តមណ្ឌលគិរី បានអោយដឹងថា ក្រុមការងារបានធ្វើអន្តរាគមន៍ជួយសង្គ្រោះភ្លាមៗ ដោយមានការចូលរួមពីអង្គការដៃគូ ដែលអាចធ្វើឲ្យកូនសត្វដំរីព្រៃ១ក្បាលនេះងើបឈរ និងដើរបាន។ ចាប់ពីយប់ថ្ងៃទី១៧-១៨-១៩ ខែមករា ឆ្នាំ២០២០ ក្រុមការងារបានខិតខំជួយ សង្គ្រោះដោយបន្តការថែទាំ យ៉ាងយកចិត្តទុកដាក់បំផុត ដើម្បីអាចឲ្យកូនសត្វដំរី ១ក្បាលនេះ ឆាប់ជាសះស្បើយពីស្ថានភាពជំងឺ។ ជាអកុសលនៅវេលាយប់ថ្ងៃទី១៩ ខែមករា ឆ្នាំ២០២០ កូនសត្វដំរីព្រៃ១ក្បាលនេះចាប់ផ្ដើមអស់កម្លាំង លែងកម្រើក លែងទទួលចំណី និងទឹក រហូតដល់វេលាម៉ោង៣ទៀបភ្លឺឈានចូលថ្ងៃទី២០ ខែមករា ឆ្នាំ២០២០ ស្ថានភាព និងអាការៈរោគសញ្ញាជំងឺរបស់កូនសត្វដំរី១ក្បាលនេះ បានបាត់បង់ជីវិតគួរឲ្យសង្វេគ។

មន្ទីរបរិស្ថានខេត្តមណ្ឌលគិរី និងក្រុមការងារជួយសង្គ្រោះទាំងអស់ ក៏បានសម្តែងកាសោកស្តាយចំពោះការបាត់បង់កូនសត្វដំរីព្រៃញីចំនួន១ក្បាលនេះ។ បើតាមការសន្និដ្ឋានរបស់អ្នកជំនាញ មូលហេតុធ្វើឱ្យមេ និងហ្វូងរបស់កូនសត្វដំរីព្រៃ១ក្បាលនេះ សម្រេចដើរចាកចោលកូនដំរីនេះ ដោយសារតែស្ថានភាព និងការវិវត្តនៃអាការៈជំងឺរបស់កូនដំរីនេះ មានសភាពធ្ងន់ធ្ងរខ្លាំង មិនអាចព្យាបាលជាសះស្បើយបាន។

គួរបញ្ជាក់ថា កូនសត្វដំរីព្រៃញីមួយក្បាលនេះ ត្រូវបានមន្ត្រីឧទ្យានុរក្សដែនជម្រកសត្វព្រៃភ្នំព្រេច ប្រទះឃើញកាលពីព្រឹកថ្ងៃទី១៧ ខែមករា ក្នុងស្ថានភាពហត់អស់ កម្លាំងខ្លាំង និងមានជំងឺនៅត្រង់អវយវៈពោះ និងមាត់ ស្ថិតនៅក្រោមបរិយាកាស និងអាកាសធាតុក្ដៅ។ នៅគ្រាដែលមន្ត្រីប្រទះឃើញកូនដំរីនោះភ្លាម មន្ត្រីជំនាញក៏បានផ្តល់ទឹក និងជួយសង្គ្រោះថែទាំ និងផ្តល់ចំណីនៅនឹងកន្លែងផងដែរ៕

The post កូនដំរីញី ដែលប្រទះឃើញនៅដែនជម្រកសត្វព្រៃភ្នំព្រេច បានស្លាប់ហើយនៅថ្ងៃទី២០ មករានេះ appeared first on MYFM News.

ប្រទះឃើញកូនដំរីព្រៃទើបកើតថ្មីៗមួយក្បាល នៅក្នុងដែនជម្រកភ្នំព្រេច

myfm radio — Sun, 19 Jan 2020 04:28:21 +0000

មន្ត្រីបរិស្ថានក្នុងដែនជម្រកភ្នំព្រេច បានប្រទះឃើញកូនដំរីព្រៃមួយក្បាល ដែលទើបកើតថ្មីៗហើយទំនងជាវង្វេងហ្វូង ដាច់ទឹក និងចំណី ព្រមទាំងមានសភាពស្គមស្គាំង។

ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន បានឲ្យដឹងថា មន្ត្រីជំនាញប្រទះឃើញកូនដំរីមួយក្បាលនៅភ្នំព្រេច ខេត្តមណ្ឌលគិរី ប្រហែលជាវង្វេងហ្វូង។

ឯកឧត្តម បន្តថា នៅគ្រាដែលមន្ត្រីប្រទះឃើញកូនដំរីនោះភ្លាម មន្ត្រីជំនាញក៏បានផ្តល់ទឹក និងជួយសង្គ្រោះថែទាំ និងផ្តល់ចំណីនៅនឹងកន្លែង ដោយសង្ឃឹមថាហ្វូងដំរីមេ របស់វា នឹងវិលមករកវិញកូនដំរីខាងលើនេះវិញ៕

The post ប្រទះឃើញកូនដំរីព្រៃទើបកើតថ្មីៗមួយក្បាល នៅក្នុងដែនជម្រកភ្នំព្រេច appeared first on MYFM News.

មណ្ឌលគិរី Archives - MYFM News

កូនដំរីញី ដែលប្រទះឃើញនៅដែនជម្រកសត្វព្រៃភ្នំព្រេច បានស្លាប់ហើយនៅថ្ងៃទី២០ មករានេះ

ប្រទះឃើញកូនដំរីព្រៃទើបកើតថ្មីៗមួយក្បាល នៅក្នុងដែនជម្រកភ្នំព្រេច