កម្ពុជា Archives - MYFM News

កម្ពុជា ឈ្នះហ្វីលីពីន ១-០ បន្តឈរលើកំពូលតារាងពូល A

myfm radio — Thu, 17 Feb 2022 21:04:19 +0000

ក្រុម U23 ឆ្នាំកម្ពុជា យកឈ្នះក្រុម U23 ហ្វីលីពីន ដោយលទ្ធផល ១-០ ក្នុងការប្រកួតសន្សំពិន្ទុលើកទី២ក្នុងពូល A ជើងឯក AFF U23 Championship 2022 នៅពហុកីឡដ្ឋានជាតិមរតកតេជោ។

គ្រាប់បាល់ជ័យជម្នះរបស់កម្ពុជារកបានដោយកីឡាករវ័យក្មេងជាងគេសម្រាប់កម្ពុជា ស៊ីន សុវណ្ណមករា នៅនាទី៨១។

ដូច្នេះកម្ពុជាមាន៦ពិន្ទុបន្តឈរលើកំពូលតារាងពូល A ដោយសង្ឃឹមខ្ពស់ឡើងវគ្គពាក់កណ្តាលផ្តាច់ព្រ័ត្រ។ សម្រាប់ការប្រកួតចុងក្រោយ កម្ពុជាត្រូវការត្រឹមស្មើនឹងទីម័រខាងកើតក៏ឈរលើកំពូលតារាងឡើងទៅវគ្គ៤ក្រុមចុងក្រោយ។

ពិន្ទុបណ្តោះអាសន្ន ពូល A

-កម្ពុជា មាន ៦ពិន្ទុ

-ទីម័រខាងកើត មាន៤ពិន្ទិ

-ហ្វីលីពីន មាន ១ពិន្ទុ

-ព្រុយណេ មាន ០ពិន្ទុ

The post កម្ពុជា ឈ្នះហ្វីលីពីន ១-០ បន្តឈរលើកំពូលតារាងពូល A appeared first on MYFM News.

កម្ពុជា ឈ្នះព្រុយណេ ៦-០ ក្នុងព្រឹត្តិការណ៍ប្រកួតជើងឯកយុវជនអាយុក្រោម២៣ឆ្នាំប្រចាំតំបន់អាស៊ាន ឆ្នាំ២០២២

myfm radio — Mon, 14 Feb 2022 16:41:26 +0000

អាចចាត់ទុកជាកំណត់ត្រាប្រវត្តិសាស្ត្រថ្មីក្នុងវិស័យបាល់ទាត់កម្ពុជា នៅពេលក្រុម U23 កម្ពុជាបានយកឈ្នះ U23 ព្រុយណេ ដោយលទ្ធផល ៦-០ សម្រាប់ការប្រកួតដំបូងក្នុងពូល A ជើងឯក AFF U23 Championship 2022 នៅពហុកីឡដ្ឋានជាតិមរតកតេជោ។

វគ្គទី១ភ្លាម កម្ពុជាស៊ុតចូលបាន៣គ្រាប់ដែលរកបានដោយកីឡាករ៣នាក់ផ្សេងគ្នាគឺតារាឆ្នើម សៀង ចន្ធា នៅនាទីទី១៨។ តារាកំពុងរះ ញាណ សុស៊ីដាន នៅនាទី២០ និងសមាជិកវិសាខា សារ ទី។

វគ្គទី២ ថ្វីបើមានការរំខានដោយភ្លៀងធ្លាក់រហូតពន្យារពេលការប្រកួត៣០នាទី ប៉ុន្តែក្រោយដំណើរការប្រកួត កម្ពុជារកបាន៣គ្រាប់ទៀតដោយកីឡាករ៣នាក់ផ្សេងគ្នាគឺ តាំង ប៊ុនឆៃ, សរ រតនា និង ណារ៉ុង កក្កដា។

ជ័យជម្នះនេះ កម្ពុជាឈរលើកំពូលតារាងពូល A ដោយមាន៣ពិន្ទុ ខណៈហ្វីលីពីន និងទីម័រខាងកើតមាន១ពិន្ទុម្នាក់ដូចគ្នា ហើយព្រុយណេគ្មានពិន្ទុនៅបាតតារាងបណ្តោះអាសន្ន៕

The post កម្ពុជា ឈ្នះព្រុយណេ ៦-០ ក្នុងព្រឹត្តិការណ៍ប្រកួតជើងឯកយុវជនអាយុក្រោម២៣ឆ្នាំប្រចាំតំបន់អាស៊ាន ឆ្នាំ២០២២ appeared first on MYFM News.

អគារនិងសមិទ្ធផលនានាក្នុងវិទ្យាស្ថានគរុកោសល្យរាជធានីភ្នំពេញ ត្រូវបានសម្ពោធដាក់ឱ្យប្រើប្រាស់ជាផ្លូវការ

myfm radio — Wed, 09 Feb 2022 14:27:53 +0000

អគារ និងសមិទ្ធផលនានាជាជំនួយហិរញ្ញប្បទានឥតសំណងរបស់រាជរដ្ឋាភិបាល និងប្រជាជនជប៉ុនតាមរយៈទីភ្នាក់ងារ JICA នៅវិទ្យាស្ថានគរុកោសល្យរាជធានីភ្នំពេញ បានដាក់សម្ពោធអោយប្រើប្រាស់ជាផ្លូវការនៅថ្ងៃទី៩ ខែកុម្ភៈ ឆ្នាំ២០២២ ក្រោមអធិបតីភាពដ៏ខ្ពង់ខ្ពស់របស់ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ តំណាងដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និង ឯកឧត្តម មីកាមី ម៉ាសាហ៊ីរ៉ូ ឯកអគ្គរាជទូតជប៉ុនប្រចាំព្រះរាជាណាចក្រកម្ពុជា។នៅក្នុងពិធីសម្ពោធដាក់អោយប្រើប្រាស់អគារ និងសមិទ្ធផលនានានោះ ឯកឧត្តម អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានលើកឡើងថា សមិទ្ធផលទាំងនេះ បានស្តែងឱ្យឃើញពីទស្សនវិស័យនៃការ បោះជំហានទៅមុខ មួយដំណាក់កាលទៀត របស់កំណែទម្រង់វិស័យអប់រំ នៅក្នុងអាណត្តិនីតិកាលទី ៦ របស់រាជរដ្ឋាភិបាលកម្ពុជា ជាពិសេសកំណែទម្រង់ប្រព័ន្ធបណ្តុះបណ្តាលគ្រូបង្រៀន។ជំនួសមុខឱ្យរាជរដ្ឋាភិបាលកម្ពុជា ថ្នាក់ដឹកនាំ និងបុគ្គលិកអប់រំនៃក្រសួងអប់រំ យុវជន និងកីឡា ឯកឧត្តមក៏បានថ្លែងអំណរគុណដល់រាជរដ្ឋាភិបាលប្រទេសជប៉ុននិងប្រជាជនជប៉ុន ដែលបានផ្តល់ ជំនួយហិរញ្ញប្បទានឥតសំណង ជាបន្តបន្ទាប់ ដល់កម្ពុជា និងប្រកបដោយសារៈប្រយោជន៍បំផុតក្នុងការអភិវឌ្ឍវិស័យអប់រំ និង ចូលរួមចំណែកយ៉ាងធំធេងក្នុងកំណែទម្រង់វិស័យអប់រំនៅកម្ពុជា។

ជាមួយគ្នានោះដែរ ឯកឧត្តម មីកាមី ម៉ាសាហ៊ីរ៉ូ ឯកអគ្គរាជទូតជប៉ុនប្រចាំកម្ពុជា ក៏បានបង្ហាញសេចក្តីសោមនស្សរីករាយ នឹងរំពឹងជឿជាក់ថា អគារថ្មីនឹងផ្តល់ឲ្យសាស្ត្រាចារ្យ និងគរុនិសិ្សត នូវ ឱកាសដ៏ល្អក្នុងការសិក្សា និងបង្រៀនជាមួយបរិយាកាសប្រកបដោយផាសុកភាព និងនិរន្តរភាព ដែលមានបំពាក់ដោយសម្ភារៈបរិក្ខារសមស្រប។

គួរបញ្ជាក់ថា វិទ្យាស្ថានគរុកោសល្យរាជធានីភ្នំពេញ ត្រូវបានបង្កើតឡើងនៅថ្ងៃទី២២ ខែឧសភា ឆ្នាំ២០១៧ ដែលដើមឡើយជាអតីតមជ្ឈមណ្ឌលគរុកោសល្យភូមិភាគរាជធានីភ្នំពេញ និងសាលាគរុកោសល្យ និងវិក្រឹតការរាជធានីភ្នំពេញ។ ភារកិច្ចស្នូលរបស់វិទ្យាស្ថានគរុកោសល្យរាជធានីភ្នំពេញ គឺរ៉ាប់រងបណ្ដុះបណ្ដាលគ្រូបង្រៀនថ្នាក់បរិញ្ញាបត្រអប់រំ និងធ្វើវិក្រឹតការគ្រូបង្រៀនសម្រាប់កម្រិតបឋមសិក្សា និងកម្រិតមូលដ្ឋានបង្រៀននៅអនុវិទ្យាល័យ។ កាលពីពេលថ្មីៗនេះ វិទ្យាស្ថានគរុកោសល្យរាជធានីភ្នំពេញ ក៏បានទទួលការដំឡើងឱ្យមានឋានៈស្មើ នឹងអគ្គនាយកដា្ឋនផងដែរ។

The post អគារនិងសមិទ្ធផលនានាក្នុងវិទ្យាស្ថានគរុកោសល្យរាជធានីភ្នំពេញ ត្រូវបានសម្ពោធដាក់ឱ្យប្រើប្រាស់ជាផ្លូវការ appeared first on MYFM News.

ជប៉ុនផ្តល់រថយន្តពន្លត់អគ្គីភ័យ៤គ្រឿង ជូនដល់រាជធានីភ្នំពេញ

myfm radio — Mon, 24 Jan 2022 13:52:49 +0000

រថយន្តពន្លត់អគ្គិភ័យចំនួន៤គ្រឿង ជាជំនួយឥតសំណងរបស់រដ្ឋាភិបាលជប៉ុន បានប្រគល់ជូនរដ្ឋបាលរាជធានីភ្នំពេញ នៅថ្ងៃទី២៤ ខែមករា ឆ្នាំ២០២២ ក្រោមអធិបតីភាព ឯកអគ្គរាជទូតជប៉ុនប្រចាំនៅកម្ពុជា និងអភិបាលរាជធានីភ្នំពេញ។ រថយន្តពន្លត់អគ្គិភ័យចំនួន៤គ្រឿងដែលជារដ្ឋាភិបាលជប៉ុនផ្ដល់ជូនរដ្ឋបាលរាជធានីភ្នំពេញ ជាប្រភេទរថយន្តពន្លត់អគ្គិភ័យដែលប្រើប្រាស់រួច រួមមាន រថយន្តបូមទឹកពន្លត់អគ្គិភ័យចំនួន២គ្រឿង, រថយន្តពន្លត់អគ្គិភ័យបំពាក់ដោយសារធាតុគីមីចំនួន១គ្រឿង និងរថយន្តពន្លត់អគ្គិភ័យបំពាក់ដោយជណ្តើរកម្ពស់៤០ម៉ែត្រ ចំនួន១គ្រឿង ។

ក្នុងពិធីប្រគល់ទទួល រថយន្តពន្លត់អគ្គិភ័យចំនួន៤គ្រឿង នៅព្រឹកថ្ងៃទី២៤ ខែមករា ឆ្នាំ២០២២ ឯកឧត្តម ឃួង ស្រេង អភិបាលរាជធានីភ្នំពេញ បានលើកឡើងថា ការផ្តល់នូវជំនួយបច្ចេកទេស និងរថយន្តពន្លត់អគ្គិភ័យដែលមានសមត្ថភាពរបស់ជប៉ុននាពេលនេះ គឺពិតជាបានឆ្លើយតបទៅនឹងតម្រូវការចាំបាច់ចំពោះមុខរបស់រដ្ឋបាលរាជធានីភ្នំពេញ ដើម្បីធានាដល់ប្រសិទ្ធភាពនៃការអន្តរាគមន៍ពន្លត់អគ្គិភ័យក្នុងទីក្រុង បានទាន់ពេលវេលា និងកាន់តែប្រសើរឡើង ស្របពេលដែលរាជធានីភ្នំពេញ កំពុងប្រឈមទៅនឹងបញ្ហាការងារបង្ការ និងពន្លត់អគ្គិភ័យដែលអាចកើតមានចំពោះសំណង់អគារខ្ពស់ៗ និង បណ្តាអាជីវកម្មដ្ឋានងាយឆាបឆេះ ។

ជាមួយគ្នានេះ ឯកឧត្តម មិកាមិ ម៉ាសាហ៊ីរ៉ូ ឯកអគ្គរាជទូត ជប៉ុនប្រចាំនៅកម្ពុជា ក៏រំពឹងដែរថា រថយន្តពន្លត់អគ្គិភ័យចំនួន៤គ្រឿង នឹងអាចអនុវត្តការសង្គ្រោះ និងឆ្លើយតបបន្ទាន់ទៅនឹងគ្រោះអគ្គិភ័យនៅក្នុងអគារខ្ពស់ៗ និងឧប្បត្តិហេតុនានាដែលបង្កឡើងដោយវត្ថុធាតុដែលមានគ្រោះថ្នាក់ខ្ពស់ ដោយប្រើប្រាស់រថយន្តពន្លត់អគ្គិភ័យដែលបំពាក់ដោយសារធាតុគីមី ជួយសង្គ្រោះប្រកបដោយប្រសិទ្ធភាព។

គួរបញ្ជាក់ថា តាមរបាយការណ៍របស់ស្នងការដ្ឋាននគរបាលរាជធានីភ្នំពេញ បានបង្ហាញថា ក្នុងឆ្នាំ២០២១ កន្លងទៅ គ្រោះអគ្គិភ័យនៅរាជធានីភ្នំពេញ បានកើតមានឡើងចំនួន ១៣០ លើក បណ្តាលឱ្យមនុស្សស្លាប់ចំនួន ១២ នាក់របួសចំនួន២៣ នាក់ និងបានបណ្តាលឱ្យខូចខាតទ្រព្យ សម្បត្តិ ដូចជា ឆេះផ្ទះ២៨ខ្នង ឃ្លាំង រោចក្រ ១០ កន្លែង បន្ទប់ស្នាក់នៅ ៣៦ បន្ទប់ រថយន្ត ៣៦ គ្រឿងយានយន្ត គ្រឿងចក្រ និងសម្ភារះ-បរិក្ខារមានតម្លៃជាច្រើនទៀត។ដោយឡែក គ្រោះអគ្គិភ័យកើតឡើងក្នុងឆ្នាំ២០២១នៅទូទាំងប្រទេសសរុបមានចំនួន ៦៧០លើក សម្លាប់មនុស្ស ១៨នាក់ និងរបួស ៣៥នាក់ ។ រីឯមូលហេតុ នៃគ្រោះអគ្គិភ័យទាំងនោះ កើតឡើងដោយសារឆ្លងចរន្តអគ្គិសនី ៣៩ភាគរយ បង្កដោយភ្លើងទៀនធូប ៣៨ភាគរយ និងពុំដឹងមូលហេតុ ២៨ភាគរយ។

The post ជប៉ុនផ្តល់រថយន្តពន្លត់អគ្គីភ័យ៤គ្រឿង ជូនដល់រាជធានីភ្នំពេញ appeared first on MYFM News.

កម្ពុជា ផ្ដល់ជំនួយថវិកា ១៣លានដុល្លារ និងវ៉ាក់សាំងស៊ីណូវ៉ាក់ ៥០ម៉ឺនដូសដល់ប្រទេសឡាវ

myfm radio — Mon, 29 Nov 2021 15:43:14 +0000

សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានប្រកាសផ្ដល់ជំនួយចំនួន ១៣លានដុល្លារ និងវ៉ាក់សាំងស៊ីណូវ៉ាក់ ៥០ម៉ឺនដូសបន្ថែមទៀត ដល់រដ្ឋាភិបាល និងប្រជាជនឡាវ ដើម្បីប្រយុទ្ធប្រឆាំងនឹងជំងឺកូវីដ១៩។ ថវិកា៣លានដុល្លាររបស់រាជរដ្ឋាភិបាល និង១០លានដុល្លាររបស់ក្រុមហ៊ុនឯកជន។ ការប្រកាសផ្តល់ជំនួយជាថវិកា និងវ៉ាក់សាំងនេះ បានធ្វើឡើងនៅក្នុងជំនួបពិភាក្សាការងារទ្វេភាគីរវាងសម្តេចតេជោ ហ៊ុន សែន និងឯកឧត្តម ផនខាំ វីផាវ៉ាន់ នាយករដ្ឋមន្ត្រីឡាវនៅវិមានសន្តិភាព នាល្ងាចថ្ងៃទី២៩ ខែវិច្ឆិកា ឆ្នាំ២០២១នេះ។

យោងតាមឯកឧត្តម អ៊ាង សុផល្លែត រដ្ឋលេខាធិការក្រសួងបរិស្ថាន បានបញ្ជាក់ថា ថវិកាដែលសម្តេចតេជោ ប្រកាសជួយដល់ប្រទេសឡាវនេះ ៣លានដុល្លារជាថវិការបស់រាជរដ្ឋាភិបាលកម្ពុជា និង ១០លានដុល្លារទៀត គឺជាថវិការបស់សប្បុរសជនកម្ពុជា។

គួរបញ្ជាក់ថា នៅក្នុងជំនួបពិភាក្សាការងារនេះឯកឧត្តម ផនខាំ វីផាវ៉ាន់ នាយករដ្ឋមន្ត្រីឡាវ បានអបអរសាទរកម្ពុជា ដែលទទួលបានជោគជ័យលើការគ្រប់វិស័យ មានដូចជាការធ្វើជាម្ចាស់ផ្ទះកិច្ចប្រជុំកំពូលអាស៊ី-អឺរ៉ុប និងការទទួលធ្វើជាម្ចាស់ផ្ទះកិច្ចប្រជុំកំពូលអាស៊ាននាឆ្នាំ២០២២ខាងមុខ។ ពាក់ព័ន្ធការធ្វើជាម្ចាស់ផ្ទះកិច្ចប្រជុំកំពូលអាស៊ាននេះ លោកនាយករដ្ឋមន្ត្រីឡាវ បានសន្យាសហការជាមួយកម្ពុជា ជួយកម្ពុជាឱ្យទទួលបានជោគជ័យលើការធ្វើជាម្ចាស់ផ្ទះកិច្ចប្រជុំកំពូលអាស៊ាននេះ។

បើតាមឯកឧត្តម អ៊ាង សុផល្លែត នៅក្នុងជំនួបនេះ នាយករដ្ឋមន្ត្រីឡាវ ក៏បានស្នើសម្ដេចតេជោ បន្តពង្រឹងពង្រីកកិច្ចសហប្រតិបត្តិការទ្វេភាគី។ ជាពិសេស គឺការបន្តកិច្ចសហប្រតិបត្តិការទ្វេភាគីគ្នាទៅវិញទៅមក ដើម្បីបញ្ចប់បញ្ហានៃការព្រមព្រៀងគ្នាជាពេលកន្លងមក។ ជាពិសេស ការចរចាគ្នានឹងពិភាក្សាគ្នាធ្វើយ៉ាងណាបញ្ចប់កិច្ចព្រមព្រៀងកិច្ចសហប្រតិបត្តិការ ក្នុងភាពជាដៃគូគ្រប់ជ្រុងជ្រោយ។

នាយករដ្ឋមន្ត្រីឡាវ ក៏បានជំរុញឲ្យគណៈកម្មការចម្រុះព្រំដែននៃប្រទេសទាំងពីរបន្តធ្វើយ៉ាងណា សម្រេចការងារព្រំដែនដូចដែលបានកំណត់។ ឯកឧត្តម ផនខាំ វិផាវ៉ាន់ ក៏បានស្នើជំរុញកិច្ចសហប្រតិបត្តិការលើការធ្វើពាណិជ្ជកម្មទ្វេភាគី និងពង្រឹងកិច្ចសហប្រតិបត្តិការលើវិស័យអប់រំ វប្បធម៌ និងលើវិស័យទេសចរណ៍ ផ្សេងទៀត។ លោកនាយករដ្ឋមន្ត្រីឡាវ ក៏បានស្នើជំរុញការវិនិយោគនៅឡាវផងដែរ។

សម្រាប់សម្តេចតេជោនាយករដ្ឋមន្ត្រីកម្ពុជាវិញ បានស្នើសុំឱ្យនាយករដ្ឋមន្ត្រីឡាវ ធ្វើយ៉ាងណាឲ្យប្រជាជនទាំងពីរអាចធ្វើដំណើរទៅវិញទៅមក ដើម្បីដោះដូរពាណិជ្ជកម្មតាមព្រំដែន។ សម្ដេចតេជោ បានបង្ហាញការគាំទ្រការលើកឡើងក្នុងការជំរុញពាណិជ្ជកម្មទ្វេភាគី ដោយជំរុញការវិនិយោគប្រទេសទាំងពីរ គាំទ្រវិនិយោគិនប្រទេសទាំងពីរ ព្រោះការវិនិយោ គ គឺជាជាមូលដ្ឋានក្នុងការពង្រឹង និងពង្រីកកិច្ចសហប្រតិបត្តិការទាំងផ្នែកនយោបាយ សេដ្ឋកិច្ចជាដើម។

គួររម្លឹកថា កាលពីឆ្នាំ២០២០ រាជរដ្ឋាភិបាលកម្ពុជា បានផ្តល់ជំនួយមនុស្សធម៌ជាម៉ាស់ ២លានម៉ាស់ និងបរិក្ខារវេជ្ជសាស្ត្រចំនួន ១១មុខផ្សេងទៀត ជូនរដ្ឋាភិបាលឡាវ។ កាពីថ្ងៃទី២៩ ខែកញ្ញា ឆ្នាំ២០២១ កម្ពុជា បានផ្តល់ជំនួយជាវ៉ាក់សាំងប្រភេទស៊ីណូវ៉ាក់ ចំនួន២០ម៉ឺនដូសដល់ឡាវផងដែរ៕

The post កម្ពុជា ផ្ដល់ជំនួយថវិកា ១៣លានដុល្លារ និងវ៉ាក់សាំងស៊ីណូវ៉ាក់ ៥០ម៉ឺនដូសដល់ប្រទេសឡាវ appeared first on MYFM News.

កងទ័ពកម្ពុជានិងកងទ័ពវៀតណាម ចុះអនុស្សារណៈយោគយល់រួមគ្នាពង្រឹងការគ្រប់គ្រង ការពារ និងរក្សាសន្តិសុខ តាមបណ្តោយព្រំដែន

myfm radio — Wed, 03 Feb 2021 14:50:40 +0000

បញ្ជាការដ្ឋានកងទ័ពជើងគោកនៃកង យោធពលខេមរភូមិន្ទ និងបញ្ជាការដ្ឋានកងទ័ពការពារព្រំដែន ក្រសួងការពារប្រទេសនៃសាធារណរដ្ឋសង្គមនិយមវៀតណាម នាថ្ងៃទី០៣ ខែកុម្ភៈ ឆ្នាំ២០២១ បានចុះហត្ថលេខាលើអនុស្សារណៈនៃការយោគយល់ស្តីពីកិច្ចសហប្រតិបត្តិការការពារព្រំដែនគោកជាមួយគ្នា។ ពិធីចុះហត្ថលេខាលើអនុស្សាសារណៈនេះបានធ្វើឡើងនៅទីបញ្ជាការកង ទ័ពជើងគោកនៃកងយោធពលខេមរភូមិន្ទ ។

អនុស្សារណៈនៃការយោគយល់នេះ មានគោលបំណងក្នុងការពង្រឹង និងលើកកំពស់បន្ថែមទៀតនូវលទ្ធផលការងារសហការគ្រប់គ្រង ការពារព្រំដែនរួម និងរួមគ្នារក្សានូវសន្តិសុខ សណ្តាប់ធ្នាប់ កសាងព្រំដែនគោក នៃប្រទេសទាំងពីរ កម្ពុជា វៀតណាម ឱ្យទទួលបាននូវសុខសន្តិភាព មិត្តភាព ស្ថិរភាព កិច្ចសហប្រតិបត្តិការ និងអភិវឌ្ឍន៍។

ឧត្តមសេនីយ៍ឯក មេបញ្ជាការ កងទ័ពជើងគោក ក៏បានយកឱកាសនេះជូនពរដល់ថ្នាក់ដឹកនាំ កងទ័ព និងប្រជាជនវៀតណាម ក្នុងឱកាសនៃពិធីបុណ្យចូលឆ្នាំថ្មីប្រពៃណីជាតិវៀតណាម ដែលខិតជិតមកដល់នាពេលខាងមុខនេះ៕

The post កងទ័ពកម្ពុជានិងកងទ័ពវៀតណាម ចុះអនុស្សារណៈយោគយល់រួមគ្នាពង្រឹងការគ្រប់គ្រង ការពារ និងរក្សាសន្តិសុខ តាមបណ្តោយព្រំដែន appeared first on MYFM News.

ស្ថានទូតវៀតណាមប្រចាំកម្ពុជា ផ្តល់ម៉ាសចំនួន៤ពាន់ម៉ាសដល់រដ្ឋបាលខេត្តកំពង់ឆ្នាំង ដើម្បីចូលរួមទប់ស្កាត់ការរីករាលដាលជំងឺកូវីដ១៩

myfm radio — Sat, 25 Apr 2020 05:04:25 +0000

កំពង់ឆ្នាំង ៖ ស្ថានទូតសាធារណ:រដ្ឋសង្គមនិយមវៀតណាមប្រចាំកម្ពុជា បានផ្តល់ម៉ាសចំនួន៤០០០ម៉ាសដល់រដ្ឋបាលខេត្តកំពង់ឆ្នាំង ដើម្បីចូលរួមទប់ស្កាត់ការរីករាលដាលនៃជំងឺកូវីដ១៩ ។

ពិធីប្រគល់-ទទួលម៉ាសដែលបានរៀបចំឡើងនៅព្រឹកថ្ងៃទី២៥ ខែមេសា ឆ្នាំ២០២០ នៅសាលាខេត្តកំពង់ឆ្នាំងក្រោមអធិបតីភាពឯកឧត្តមឈួរ ច័ន្ទឌឿន អភិបាល ខេត្តកំពង់ឆ្នាំង និង ឯកឧត្ដម ឡាយ ស៊ុនជាង ឯកអគ្គរដ្ឋទូតរងនៃសាធារណរដ្ឋសង្គមនិយមវៀតណាមប្រចាំនៅកម្ពុជា។

The post ស្ថានទូតវៀតណាមប្រចាំកម្ពុជា ផ្តល់ម៉ាសចំនួន៤ពាន់ម៉ាសដល់រដ្ឋបាលខេត្តកំពង់ឆ្នាំង ដើម្បីចូលរួមទប់ស្កាត់ការរីករាលដាលជំងឺកូវីដ១៩ appeared first on MYFM News.

កម្ពុជា-ចិន គ្រោងធ្វើលំហាត់សមយុទ្ធរួមគ្នា នៅពាក់កណ្តាលខែមីនា ខាងមុខ

myfm radio — Thu, 16 Jan 2020 02:20:40 +0000

ប្រសិនបើគ្មានការប្រែប្រួលនោះទេ លំហាត់សមយុទ្ធនាគមាសឆ្នាំ២០២០ រវាងកងទ័ពកម្ពុជា និងកងទ័ពរំដោះ ប្រជាជនចិន នឹងចាប់ផ្តើមនៅពាក់កណ្តាលខែមីនា ឆ្នាំ២០២០ ខាងមុខនេះ ក្នុងស្រុកជុំគិរី ខេត្តកំពត លើប្រធានបទ «ប្រឆាំងភេរវកម្ម និងកិច្ចការមនុស្សធម៌»។

អ្នកនាំពាក្យកងយោធពលខេមរភូមិន្ទ ឯកឧត្តម ឧត្តមសេនីយ៍ទោ ថោង សូលីម៉ូ បានអោយដឹងថា សមយុទ្ធនាគមាសឆ្នាំនេះ នឹងធ្វើលើវិញ្ញាសាមួយចំនួនដូចជា ការប្រឆាំងភេរវកម្ម ការរំដោះចំណាប់ខ្មាំង ការសង្រ្គោះប្រជាពលរដ្ឋពីគ្រោះធម្មជាតិ ការបំពេញភារកិច្ចក្រោមឆត្រអង្គការសហប្រជាជាតិ និងវិស្វរកម្មជាដើម។ ដោយឡែក អាវុធយុទ្ធភ័ណ្ឌដែលប្រើប្រាស់នៅក្នុងលំហាត់ឆ្នាំនេះ រួមមាន រថពាសដែក រថក្រោះ កាំភ្លើងធំ កាំភ្លើង ត្បាល់ ឧទ្ធម្ភាគចក្រ និងអាវុធគាំទ្រពីលើអាកាសជាដើម ស្របគ្នាកម្លាំងដែលគ្រោងចូលរួមទាំង២ភាគី មានជាងពីរពាន់នាក់។

ឯកឧត្តម ឧត្តមសេនីយ៍ទោ បានសង្កត់ធ្ងន់ថា ការធ្វើលំហាត់សមយុទ្ធនាគមាស រវាងកងទ័ពកម្ពុជា-ចិន នេះ មិនមែនជាការគំរាមកំហែងដល់ប្រទេស ឬបុគ្គលណាមួយនោះឡើយ។ លំហាត់ហ្វឹកហ្វឺននេះ ធ្វើឡើង ជារៀងរាល់ឆ្នាំ ហើយមានទ្រង់ទ្រាយធំជាបន្តបន្ទាប់ ដើម្បីពង្រឹងសមត្ថភាពដល់កងទ័ពកម្ពុជា និងទទួលបទពិសោធន៍បន្ថែមដល់ពីប្រទេសជាមិត្តតែប៉ុណ្ណោះ។

គួរបញ្ជាក់ថា លំហាត់យុទ្ធនាគមាសឆ្នាំ២០២០ រវាងកងទ័ពកម្ពុជា-ចិននេះ គឺជាលើកទី៤ ហើយ ដែលប្រទេសទាំង២បានធ្វើជាមួយគ្នាចាប់ផ្តើមតាំងពីឆ្នាំ២០១៦មក៕

The post កម្ពុជា-ចិន គ្រោងធ្វើលំហាត់សមយុទ្ធរួមគ្នា នៅពាក់កណ្តាលខែមីនា ខាងមុខ appeared first on MYFM News.

ឯកអគ្គរដ្ឋទូតអាមេរិក និងបុគ្គលិកស្ថានទូតប្រចាំកម្ពុជា ជិះរ៉ឺម៉កកង់បីជុំវិញភ្នំពេញ ដើម្បីអបអរខួបលើកទី៧០ នៃការបង្កើតទំនាក់ទំនងការទូត អាមេរិក-កម្ពុជា

myfm radio — Wed, 08 Jan 2020 14:11:35 +0000

ឯកឧត្តម W. Patrick Murphy ឯកអគ្គរដ្ឋទូតសហរដ្ឋអាមេរិកប្រចាំកម្ពុជា និងបុគ្គលិកស្ថានទូត បានធ្វើដំណើរតាមរ៉ឺម៉កកង់បីជុំវិញរាជធានីភ្នំពេញ ដើម្បីអបអរសាទរការប្រារព្ធខួបលើកទី៧០ នៃការបង្កើតទំនាក់ទំនងការទូត អាមេរិក-កម្ពុជា នារសៀលថ្ងៃទី០៨ ខែមករា ឆ្នាំ២០២០ នៅភ្នំពេញ។

គួរបញ្ជាក់ថា នៅក្នុងដំណើរតាមរ៉ឺម៉កកង់បីនោះ ឯកឧត្តម ឯកអគ្គរដ្ឋទូតក៏បានចូលអុជធូបនៅរមណីយដ្ឋានប្រវត្តិសាស្រ្តវត្តភ្នំផងដែរ៕

The post ឯកអគ្គរដ្ឋទូតអាមេរិក និងបុគ្គលិកស្ថានទូតប្រចាំកម្ពុជា ជិះរ៉ឺម៉កកង់បីជុំវិញភ្នំពេញ ដើម្បីអបអរខួបលើកទី៧០ នៃការបង្កើតទំនាក់ទំនងការទូត អាមេរិក-កម្ពុជា appeared first on MYFM News.

រុស្ស៊ីត្រៀមជាស្រេចក្នុងការជួយធ្វើទំនើបកម្មអាវុធ និងគ្រឿងបច្ចេកទេសយោធាដល់កងទ័ពកម្ពុជា

myfm radio — Fri, 27 Dec 2019 09:41:03 +0000

ឯកអគ្គរដ្ឋទូតសហព័ន្ធរុស្ស៊ី ប្រចាំព្រះរាជាណាចក្រកម្ពុជា ឯកឧត្តម Dmity Tsvetkov បានបញ្ជាក់ថា រដ្ឋាភិបាល រុស្ស៊ី នឹងនៅតែបន្តជួយធ្វើការបណ្តុះបណ្តាល ធនធានមនុស្ស ក្នុងកងយោធពលខេមរភូមិន្ទ។ ការលើកឡើងពីបំណង របស់ រដ្ឋាភិបាលរុស្ស៊ីដូចនេះ បានធ្វើឡើងនៅក្នុងជំនួបរវាងឯកឧត្តម នាយឧត្ដមសេនីយ៍ វង្ស ពិសេន អគ្គមេបញ្ជាការនៃ កងយោធពលខេមរភូមិន្ទ និងឯកឧត្តម Dmity Tsvetkov ឯកអគ្គរដ្ឋទូតសហព័ន្ធរុស្ស៊ី ប្រចាំកម្ពុជា នៅអគ្គបញ្ជាការដ្ឋាន កងយោធពលខេមរភូមិន្ទ កាលពីថ្ងៃទី២៦ ខែធ្នូ ឆ្នាំ២០១៩។

ក្នុងនោះ ឯកឧត្តម ឯកអគ្គរដ្ឋទូត ក៏បានលើកឡើង ពីការត្រៀមខ្លួនជានិច្ច ដើម្បីសហការ ជួសជុល និងធ្វើទំនើបកម្មអាវុធ យុទ្ធភណ្ឌ និងគ្រឿងបច្ចេកទេសយោធារបស់កងយោធពល ខេមរភូមិន្ទផងដែរ។

ជាការឆ្លើយរបស់កម្ពុជា ឯកឧត្តម នាយឧត្ដមសេនីយ៍ វង្ស ពិសេន បានបង្ហាញ ការពេញចិត្ត ទទួលយក ចំពោះការលើក ឡើងរបស់ ឯកឧត្តម ឯកអគ្គរដ្ឋទូត ដោយបញ្ជាក់ថា នេះគឺជា ចំណុចល្អ ដែលកម្ពុជាចង់បាន ហើយសំខាន់បំផុតនោះ គឺការ ជួយបណ្តុះបណ្តាលធនធាន មនុស្សក្នុងកងយោធពលខេមរភូមិន្ទ ការជួសជុលគ្រឿងសម្ភារបច្ចេកទេសការផ្លាស់ប្ដូរទស្សនកិច្ច និងការជួយដល់កម្លាំងកងទ័ពជើងគោកជាដើម។

ឯកឧត្តម នាយឧត្ដមសេនីយ៍ ក៏បានបន្ថែមថា បច្ចុប្បន្ននេះកម្ពុជាមានសន្តិភាពពេញលេញ និងមានការអភិវឌ្ឍន៍ រីកចម្រើនលើគ្រប់វិស័យ ដែលសមិទ្ធផលទាំងនេះ គឺមិនអាច កាត់ផ្តាច់ បានពីការ ជួយឧបត្ថម្ភរបស់មិត្តរុស្ស៊ី ហើយកម្ពុជា នៅតែចាត់ទុករុស្ស៊ី ជាមិត្តដ៍សំខាន់ទាំង ក្នុងពេលបច្ចុប្បន្ន និងតទៅអនាគត ។

គួរបញ្ជាក់ថា នៅក្នុងជំនួបនោះ ឯកឧត្តម នាយឧត្ដមសេនីយ៍ វង្ស ពិសេន បានសំណូមពរ តាមរយៈ ឯកអគ្គរដ្ឋទូត ដើម្បីអញ្ជើញ ឯកឧត្ដមអគ្គមេបញ្ជាការកងទ័ពរុស្ស៊ី មកបំពេញ ទស្សនកិច្ចនៅកម្ពុជា ក្នុងពេលវេលាណាមួយសមស្រប ដើម្បីជា សក្ខីភាពនៃ ការពង្រឹង ចំណងមិត្តភាព កិច្ចសហប្រតិបត្តិការឲ្យកាន់ តែជិតស្និទ្ធរវាងកម្ពុជានិងរុស្ស៊ីផងដែរ៕

អត្ថបទ៖ សីហា

The post រុស្ស៊ីត្រៀមជាស្រេចក្នុងការជួយធ្វើទំនើបកម្មអាវុធ និងគ្រឿងបច្ចេកទេសយោធាដល់កងទ័ពកម្ពុជា appeared first on MYFM News.

កម្ពុជា Archives - MYFM News

កម្ពុជា ឈ្នះ​ហ្វីលីពីន ១-០ បន្ត​​ឈ​រ​​​លើ​​កំពូល​​​តារាង​​ពូល A

ជប៉ុនផ្តល់​រថយន្តពន្លត់អគ្គីភ័យ​​៤គ្រឿង ជូន​ដល់​រាជធានី​ភ្នំពេញ

កម្ពុជា ផ្ដល់ជំនួយថវិកា​ ១៣​លាន​ដុល្លារ និងវ៉ាក់​សាំង​ស៊ីណូវ៉ាក់ ៥០ម៉ឺន​ដូសដល់ប្រទេសឡាវ

កម្ពុជា-ចិន គ្រោងធ្វើលំហាត់សមយុទ្ធរួមគ្នា នៅពាក់កណ្តាលខែមីនា ខាងមុខ

រុស្ស៊ីត្រៀមជាស្រេចក្នុងការជួយធ្វើទំនើបកម្មអាវុធ និងគ្រឿងបច្ចេកទេសយោធាដល់កងទ័ពកម្ពុជា

កម្ពុជា ឈ្នះហ្វីលីពីន ១-០ បន្តឈរលើកំពូលតារាងពូល A

ជប៉ុនផ្តល់រថយន្តពន្លត់អគ្គីភ័យ៤គ្រឿង ជូនដល់រាជធានីភ្នំពេញ

កម្ពុជា ផ្ដល់ជំនួយថវិកា ១៣លានដុល្លារ និងវ៉ាក់សាំងស៊ីណូវ៉ាក់ ៥០ម៉ឺនដូសដល់ប្រទេសឡាវ