ប្រជាជនក្នុងភូមិបង្កោង ប្រុស ស្រី ចាស់ ក្មេង ប្រមាណ៥០០នាក់ បានមកប្រមូលផ្តុំគ្នានៅបឹងធំមួយ ស្ថិតនៅក្នុងភូមិបង្កោង ឃុំអំពិល ស្រុកប្រាសាទបាគង ខេត្តសៀមរាប កាលពីព្រឹកថ្ងៃទី២៥ ខែមករា ឆ្នាំ២០២០។ បឹងធំមួយនេះ អ្នកភូមិតែងតែអភិរក្សត្រីទុកមិនឱ្យមានការនេសាទផ្តេសផ្តាសនោះឡើយ គឺសម្រាប់តែរកត្រីរួមគ្នាដើម្បីយកមកធ្វើជាចង្ហាន់ប្រគេនព្រះសង្ឃក្នុងថ្ងៃឡើងមាឃ ឬឡើងអ្នកតា ដែលប្រារព្ធធ្វើឡើងនៅថ្ងៃ២៧ខែមករាឆ្នាំ២០២០ និងធ្វើម្ហូបសម្រាប់គ្រួសារ ព្រមទាំងទទួលភ្ញៀវ ដែលជាទំនៀមរបស់អ្នកស្រុកអង្គរ ប្រារព្ធធ្វើជារៀងរាល់ឆ្នាំ។
ពិធីចាប់ត្រីរួមគ្នានេះ បានធ្វើឡើងនៅម៉ោង៧ព្រឹក ដោយគណៈកម្មការភូមិបាញ់កាំជ្រួច បន្លឺស្នូរជាសញ្ញា អនុញ្ញាតឱ្យចុះចាប់ត្រីបាន។ ដោយឡែកការរកត្រីនេះ អនុញ្ញាតឱ្យតែប្រជាជនក្នុងភូមិបង្កោងតែប៉ុណ្ណោះ ដោយមិនអនុញ្ញាតឱ្យប្រជាជនក្រៅចុះចាប់នោះឡើយ និងប្រើប្រាស់តែឧបករណ៍បុរាណទាំងអស់ រួមមានដូចជា ឈ្នាង អង្រុត និងសំណាញ់ជាដើម។
ចំពោះការចាប់ត្រីនេះដែរ គណៈកម្មការបានកំណត់ជាពីរផ្នែក។ ជាដំបូងប្រជាជនទាំងអស់អាចរកត្រីទុកសម្រាប់ខ្លួនឯងផ្ទាល់ រីឯមួយផ្នែកនៃបឹងដែលដាក់សម្រាស់ការពារមិនឱ្យចាប់ពីដំបូងនោះ ត្រូវចាប់ទុករួមសម្រាប់ធ្វើទឹកនំបញ្ចុកប្រគេនព្រះសង្ឃ។
លោក ពេជ្រ ឃិន មេភូមិបង្កោង បានរៀបរាប់ថា ដោយនៅឆ្នាំនេះខ្សត់ទឹកភ្លៀង និងមិនមានទឹកធំផង ទើបមិនសូវសប្បូរត្រី ហើយគណៈកម្មការគ្រប់គ្រង និងអភិរក្សបឹងបានប្រលែងកូនត្រីប្រមាណ១៥០០ក្បាល កាលពីអំឡុងខែ១០ ដើម្បីរក្សាទិន្នផលត្រីបានផ្គត់ផ្គង់កម្មវិធីនៅឆ្នាំនេះបន្ត។
លោកបន្តថា ការចាប់ត្រីឡើងមាឃនេះ មានជាយូរយារមកហើយ ឱ្យតែមកដល់ខែមាឃ បន្ទាប់ពីបញ្ចប់ការច្រូតកាត់ និងដាក់ស្រូវក្នុងជង្រុករួចរាល់។ លោកបញ្ជាក់ថា ការរៀបចំបានអឹកធឹកប្រមាណជាង១០ឆ្នាំកន្លងមកនេះ នៅពេលលោកមានតួនាទីជាមេភូមិក្នុងភូមិបង្កោង។ លោកតែងតែអប់រំប្រជាជនក្នុងភូមិ និងអ្នកណាក៏ដោយដែលនឹងក្លាយជាអ្នកដឹកនាំបន្តវេនពីលោក ធ្វើយ៉ាងណាថែរក្សាទំនៀមទម្លាប់នេះឱ្យបានគង់វង្សសម្រាប់កូនចៅជំនាន់ក្រោយ។ លោកបន្ថែមថា ក្រៅពីថែរក្សាទំនៀមទម្លាប់ដូនតា កម្មវិធីនេះក៏បានបង្ហាញពីសាមគ្គីភាព ការសហការរវាងប្រជាជននៅក្នុងភូមិ ដោយហេតុថាបើលោកតែម្នាក់ឯង ក៏មិនអាចធ្វើឱ្យកម្មវិធីរលូនទៅមុខបានដែរ ដែលទាមទារឱ្យមានការគាំទ្រពីប្រជាជន ក្នុងនាមលោកជាអ្នកដឹកនាំ គ្រាន់តែបង្ហាញផ្លូវប៉ុណ្ណោះ។
អ្នកស្រី ឆៃ ណាត ដែលកំពុងមមាញឹកចាប់ត្រី ដៃម្ខាងកាន់អង្រុតដៃម្ខាងរាវរកត្រីក្នុងអង្រុត បាននិយាយដោយទឹកមុខរីករាយថា អ្នកស្រីបានក្រោកមកជាមួយអ្នកភូមិតាំងពីម៉ោង៥ មកម្ល៉េះ។អ្នកស្រីបន្តថា ឆ្នាំនេះមិនសូវសម្បូរត្រីដូចឆ្នាំមុនៗនោះទេ ដោយសារតែឆ្នាំនេះមិនមានទឹកធំ មានតែទឹកភ្លៀងប៉ុណ្ណោះ បណ្តាលឱ្យទិន្និផលត្រីធ្លាក់ចុះ។ អ្នកស្រីបន្តថា ថ្វីត្បិតតែមិនសូវសម្បូរ តែលោកស្រីនឹងយកត្រីមួយចំនួនសម្រាប់ធ្វើម្ហូប និងធ្វើសម្លទឹកនំបញ្ចុក ជាចង្ហាន់សម្រាប់ប្រគេនព្រះសង្ឃនៅថ្ងៃឡើងមាឃ៕
