ជប៉ុន​ផ្តល់ថវិកា​ជិត១៨​ម៉ឺន​ដុល្លារ ​សម្រាប់ស្តារប្រព័ន្ធធារាសាស្ត្រ និងពង្រឹងសហគមន៍កសិកម្ម ដល់ខេត្តចំនួន២របស់ប្រទេសកម្ពុជា

គម្រោង​ទាំង២​ដែលបាន​ទទួល​ជំនួយ​ឥត​សំណ​ង​ ពីរាជ​រដ្ឋា​ភិបាល​​ជប៉ុន​នេះ​ រួមមាន​ គម្រោងស្តារ​ ឡើងវិញ​ នូវប្រព័ន្ធ​ធារា​សាស្ត្រ​កោះ​ស្វាយ​ ក្នុង​ខេត្តកំ​ពង់​ចាម និង គម្រោង​ពង្រឹង​សហគមន៍​កសិកម្ម​ក្នុង ស្រុក​មេមត់ និ​ង ស្រុក​តំបែរ​ ខេត្តត្បូង​ឃ្មុំ ​។​

ក្នុង​ពិធី​ចុះហត្ថលេខា​លើ​​កិច្ច​ព្រម​ព្រៀង​រួម​គ្នា​លើ​ការ​ផ្តល់​ជំនួយ​ឥតសំណង​​ដែលបានធ្វើ​ឡើង​​កាល​ពីថ្ងៃ​ទី​​២២ ​ខែមករា​  ឯកឧត្តម​ មិ​កា​មិ​ ម៉ា​សា​​ហ៊ី​រ៉ូ ​ឯកអគ្គរាជ​ទូត​​ជប៉ុន​​ប្រចាំ​​កម្ពុជា ​បាន​​បញ្ជាក់​ថា សម្រាប់​ការស្តារ​ប្រព័ន្ធធារា​សាស្ត្រ​នៅឃុំត្រពាំង​ព្រះ ស្រុក​ព្រៃ​ឈរ ខេត្ត​កំពង់​ចាម​ គម្រោង​ នេះ​នឹងធានា​បាននូវការ​ផ្គត់ផ្គ​ង់​ទឹក​ប្រកប​ដោយ​ប្រសិទ្ធ​ភាព​​ដោយ​រំពឹង​ថា​នឹង​ ផ្តល់​ផល​ប្រយោជន៍ ​ដល់​ប្រជាជន​ក្នុងតំបន់​ សម្រាប់​បង្ក​បង្កើន​ផល​កសិកម្ម ​ដំណាំស្រូវ ​ដោយឡែក​តាមរយៈ​ស្តារទំនប់​ទឹក ដោយ​ប្រើប្រាស់​ជាផ្លូវ ​ក៏បង្ក​ភាព​ងាយ​ស្រួល​សម្រាប់​ដឹកជញ្ជួន​ដំណាំ​កសិកម្ម​ផងដែរ​។

ឯកឧត្តម ឯកអគ្គរាជទូត ​បន្តថា​ គម្រោង​ពង្រឹង​សហគមន៍​កសិកម្ម​ក្នុង ស្រុក​មេមត់ និង ស្រុក​តំបែរ ខេត្តត្បូង​ឃ្មុំ គម្រោង​នេះ​ក៏ រំពឹង​ថា​ មាន​ប្រជា​កសិករ​ប្រមាណ ​៤៥០​ នាក់​ដែលជា ​សមាជិក​របស់ សហគមន៍​កសិកម្ម ​នឹងទទួល​បានអត្ថប្រយោជន៍​ពីការ​កែលម្អ​គុណភាព​ ផលិត​ផល​ កសិកម្ម​របស់ ពួកគាត់ និងបន្ថែម ខ្សែសង្វាក់​តម្លៃឲ្យ​កាន់​តែស៊ីជម្រៅ​ក្នុងអាជីវកម្ម​របស់ សហគមន៍​កសិកម្ម  តាមរយៈ​ការសាង​សង់​ឃ្លាំង ​ស្តុក​​ តម្លើង​ម៉ាស៊ីន​សម្ងួ​តម្រេចនិង ឧបករណ៍​កែ​ច្នៃ​គ្រាប់ ​ស្វាយ​ចន្ទី​ ជា​ដើម។

សូម​ជម្រាប​ថា ជំនួយ​ឥត​សំណង​គូសា​ណូ​ណិ​របស់ជប៉ុន ​បានចាប់​ផ្តើម​នៅ​ប្រទេស​កម្ពុជា​នៅឆ្នាំ​ ១៩៩១​ ដើម្បី​គាំទ្រ​ដល់​កិច្ចខិ​តខំ​ប្រឹង​ប្រែង​របស់​កម្ពុជា​ក្នុងការអភិវឌ្ឍនិង​ស្ថាបនា​ប្រទេស ឡើងវិញ នៅតាម​កម្រិត​មូលដ្ឋាន។ ចាប់​តាំង​ពីឆ្នាំ១៩៩១ មករដ្ឋា​ភិបាល​ជប៉ុន បាន​ផ្តល់​ថវិកា ជាង​៦០ លានដុល្លារ​អាមេរិក ដល់អាជ្ញា​ធរ មូល​ដ្ឋាន និងអង្គការ​ក្រៅរដ្ឋា​ភិបាល ដើម្បី​អនុវត្ត​គម្រោង គូសា​ណូ​ណិ​ចំនួន​៦២០​គម្រោង​នៅ​ទូទាំង​ប្រទេស​កម្ពុជា​៕​

ព័ត៌មាន​ទាក់​ទង

ភ្ជាប់ទំនាក់ទំនងជាមួយ វិទ្យុ ម៉ាយអេហ្វអឹម ខេត្តកំពង់ឆ្នាំង